Koch Rajbongshis-ten darkar 48 bandh huaihawt

Assam-a All Koch Rajbon­gshi Students’ Union (Akrsu), All Assam Koch Rajbongshi Sanmilani (AAKRS) leh non- Bodo organization-te chuan Thawhṭanni aṭang khan lower Assam hmun hrang hrangah darkar 48 chhung bandh an huaihawt a, nunphung pangngai a tibuai hle.

Bodoland Territorial Area Districts (BTAD) Union Terri­torial Council (UTC)-a tih­changtlun tur report a awm avangin heng pawl hrang hrang te hian bandh hi an huaihawt niin an tarlang.

Hetiang report hi an chhuah loh thu sorkar lam chuan sawilang ve nghal mah se heng pawlte hian bandh hi an huaihawt tho a ni. BTAD UTC-a hlankai hmang hian sorkar laipui chuan non-Bodo organization-te chu a nekchep dawn niin an ngai a, an duh lohna hi an lantir a ni.

Hetihlai hian Bodo orga­nization-te chuan sorkar hnenah hian state hran Bodoland state an ngiat mek a, BTAD area chinah hian state hran hun eng emaw chen chu an lo ngiat tawh a, mahse helai area-ah hian KochRajbongshis leh non-tribal community eng emaw zat an awm ve bawk.

Akrsu general secretary Gokul Barman chuan Koch-Rajbongshi-te leh non-Bodo community-te chu an rilru hnehsak an ni lo tih sawiin, BTAD UTC-a hlanklai tur report awm chuan a ti chiai hle tih a sawi. Kum tam tak an lo kalpui tawh Kamatapur state ngiata hma an lakna pawh a tibuai hle tih sawi.

BTAD din a nih aṭang khan non-Bodo community-te chu nekchepa an awm nghal thu sawiin report an hriat pawh hi an pawm theih loh thu a sawi bawk.

Dhubri-ah chuan duh lohna lantirtute hian bike rally-te huaihawtin motor tyre-te kawngpuiah an hal a, bandh hian Chirang, Bongaigaon, Baksa leh Udalguri district-a nghawng nia sawi a ni.

BTAD centre Kokrajhar-ah phei chuan venhimna hi khauh taka kalpui a ni bawk.

Rangia, Sarbhog leh Goal­para-ah chuan bandh thlawp­tute hian kawng zawhin BJP kaihhruai sorkar laipui an duh lohna thu te an auchhuahpui ve bawk a ni.

Bandh huaihawtna hmun­ah te hian sumdawnna hmun leh zirna in te khar vek a ni a, Bandh hi nimin pawh khan chhunzawm a la ni bawk.