Hmarchhak puma NRC kalpui NESO in ngiat ; Citizenship Bill 2016 hnuhkir ngiat bawk

North East Students’ Organi­zation (NESO) chuan Thawlehni aṭang khan hmarchhak puma an kalpui tum, an thil phut hrang hrang tipuitling tura sorkar nawrna tura hmalakna an neih chu Guwahati-ah an ṭan.

NESO hian Citizen (Amend­ment) Bill 2016, Foreigner Amend­ment) Order 2015, Passport (Entry in to India) Noti­fica­tion 2015 leh long term visa-te hnukkir tura nawrh an ṭan a, hmarchhak pum­puia National Register of Citi­zenship (NRC) kalpui an ngiat bawk.

NESO-ah hian Khasi Stu­dents’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) leh All Arunachal Pradesh Students’ Union (AAPSU)-te chu an tel a ni. Hmarchhak zirlai pawl te hian karhnih liamta khan hma an lak dawn thu hi an lo sawi tawh a ni.

Thawhlehni khan NESO hian Guwahati-a 'gateway of the North East'-ah mass rally an huaihawt a, NESO hnuaia zirlai pawl hrang hrang aiawh hi an kal ṭha hle.

Zirlai pawl intelkhawm aiawha thu sawi tute chuan sorkar laipui chuan ram leilung fate dinhmun tur ngaihtuah miah loa Citizenship (amendment) Bill an pawm thu a sawi a, Joint Parliamentary Committee (JPC) chu thutlukna an siam hmaa hmarchhaka kala thil awmdan diktak enfiah hmasa tura an duh thu an sawi bawk.

JPC hian tunhnai khan Assam leh Meghalaya chu an lo tlawh tawh a ni.

November 30 hian nawrh huaihawt thawh hnihna hmarchhak state tina state khawpui ṭheuhah an nei leh ang.

Parliament session ṭan hunah New Delhi-ah duh lohna lantirna hi an nei leh dawn bawk a, NESO hian Minister, MLA leh MP-te hmuh an tum thu sawiin Citizenship Bill an duh lohzia hriattir an tum a ni.

Zirlai pawl intelkhawm te hian hmarchhak puma NRC kalpui an ngiat thu an tarlang bawk a, a rang thei ang bera NRC update kalpui an duh thu NESO chairman, Sa­muel Jyrwa chuan a sawi.

Samuel Jyrwa chuan NESO chuan dan loa ramchhunga awm te chu an ngaimawh hle tih sawiin buaina leh harsatna tam tak a awm phah tih a sawi. Tripura pawhin an tribal nihna an hloh der tawh tih sawiin Bangladesh aṭanga dan loa lut te chuan hun rei lo teah Assam state leilung fa te chu an chimral mai dawn niin a sawi bawk a ni.