Churachandpur leh achheh velah ran-te mak tak takin la thih chhunzawm zel

Hun eng emaw chen kalta aṭang khan Manipur-a Churachandpur leh a chhehvelah chuan an ran vulh lai te mak tak tak maia an thih thu hriat a ni fo a, Inrinni zanah phei kha chuan Lamka khuaah chuan khawlaiah tumah hmuh tur an awm lo hial niin TNT chuan a tarlang.

October thla tawp lam aṭang khan mihring ran vulh lai te chu danglam tak leh rapthlak tak taka an thih thu report a awm fo a, an taksa hmun ṭhenkhat te chu a chhe hneh hle ṭhin bawk.

Hetiang hian hun eng emawchen ran vulh lai te nitin deuhthaw an thih hnuah ni hnih chhung vel chu a reh deuh a, mahse Inrinni zan aṭang khan an ran vulh te hi an thi leh ṭan nia tarlan a ni.

Pathianni khan Molnom thingtlang khuaah chuan ransa pathum an thih thu report a awm a, ar pakhat chu a kawchhung chhuak veka hmuh a nih tih report a awm bawk.

Rengkai Zion Venga Agriculture Minister V Hangkhanlian-a chenna hmun, bang sang taka hung vek chhungah pawh beram an thlun pakhat chu a pum veilam chhe veka hmuh a ni bawk. Zion vengah tho hian parva vulh lai pakhat chu mak taka a thih thu report a awm ve bawk a ni.

Thudawnna ṭhenkhatin an tarlan dan chuan ransa te hi an lung lakbo a ni a, an thisen vel pawh ruang bulah hian hmuh tur a tam vak lo nia sawi a ni bawk.

Thuneitu lam chuan ransa te thihdan hi uluk taka an chhui thu an sawi. Tualchhung mite pawh zan lamah in duty chhawk mah se ran thihna thlen chhan hi an la hre thei lo a ni.