Hornbill Festival-ah vaihhlo leh a kaihhnawih khap dawn
Nagaland sorkar chuan an state festival ropui ber tih ngam, Hornbill Festival hman dan tur chungchangah thuchhuah siamin vaihhlo leh a kaihhnawih reng reng chu khap a nih dawn thu an sawi.
“Eat Right India”-a Swasth Bharat Yatra zulzuiin Nagaland sorkar chuan vaihhlo leh a kaihhnawih chu Hornbill Fesstival lai hian festival an hmanna tur Kisama thingtlang khuaah chuan zawrh an khap dawn tih an sawi.
Hemi chungchang hi Deputy Commissioner Kohima, Rajesh Soundararajan chuan Thawhlehni khan a sawi a ni.
Dan an siam hi bawhchhia an awm a nih chuan an lakah hremna an lekkawh dawn thu a sawi bawk.
Hornbill Festival hi December 1-10 chhung hian neih a ni dawn a, heta venhimna kalpui tur Tourist police-te pawh tlangzarh an lo ni tawh hial. Plastic free festival-a siam an tum thu sorkar chuan an lo sawi tawh bawk a, inbuatsaihna nasa takin an kalpui mek a ni.