Tripura Dy CM-in state budget Rs vbc 25,893 a pharh

Tripura deputy chief minister, finance changtu ni bawk Jishnu Dev Varma chuan state budget session ṭan ni, Ningani khan assembly-ah kum 2022-23 atana state budget, Rs vbc 26,893 a pharh. Sorkar sum indaih lohna tur hi rs vbc 569.52 a ni.

Budget thar hi financial year 2021-22 budget aiin 18.34% in a tam zawk.

Budget-ah hian chhiah lakna tur siam thar a awm lo a; infrastructure, industries leh social sector lama hmasawnna chu ngaih pawimawh a ni.

Kum 2022-23 chhung sorkar sum hmuh tura ruahman hi Rs vbc 26,323.15 a nih laiin, sum hman tura ruahman hi Rs vbc 26,892.67 a ni. Financial year tharah state domestic production hi 13.28%-a ṭhang tura ruahman a ni bawk.

Dev Varma chuan state chhunga mi rethei, mi nuai 3.81 hnena thla tina Rs 2,000 social pension pekna tura budget-a sum dah chu Rs vbc 415 aṭangin Rs vbc 645-ah tihpun a ni tih a sawi.

State kum 50-na lawmna peng pakhata Suvarna Jayanti Tripura Nirman Yojana hnuaia infrastructure and development project hrang hrang a tan Rs vbc 1,000 dah a ni a, World Bank chuan state leilung fate tihhmasawnna tur hna hrang hrang thawhna turin loan Rs vbc 1,300 a lo sanction tawh bawk tih Minister chuan a sawi a ni.

Tripura State Rifles (TSR) chu state chhunga hel leh inlakhran duhtute beih letna kawngah an pawimawh hle tih sawiin, Dev Varma chuan TST sipai pension hun chu kum 57 aṭangin kum 60-ah tihsan a ni, a ti. Rural area-a TRS barrack thuam ṭhatna atan Rs vbc 67 dah a ni a, hei bakah hian TRS sipaiten thla tina ration an dawn, Rs 800 chu Rs 1,000-ah tihsan a ni bawk.

Industries sector tihhmasawnna turin programme thar, Tripura Industrial Investment Promotion Incentive Scheme siam a ni dawn a, hemi atan hian Rs vbc 100 dah a ni.

Education sector-ah Rs vbc 5,026 dahin, budget hmasa aiin 20.66% a pung a ni. Health sector tana sum dah pawh 23%-a tipungin, Rs vbc 1,777 dah a ni.