Assam-ah Ukraine President hming chawiin thingpuife siam

Assam-based start-up, Aromatic Tea chuan Ukraine president Volodymyr Zelenskyy hming chawia thingpui, Assam CTC tea an siam thar chu Nilaini khan an tlangzarh.

Aromatic Tea director, Ranjit Barua chuan an thingpuife siam thar, 'Zelenskyy' chu Russia-in a run mek kara Ukraine President Zelenskyy inpekna leh huaisenna chawimawina a ni tih sawiin, online lamah lei theih tura phochhuah thuai tum a ni, a ti.

Barua chuan, "Ukraine aṭanga tlanchhiatna tur kawng hawnsak a ni chungin President Zelenskyy hian a hnar a, indonaah hnehna an chang mai dawn lo tih hre reng chungin theihtawpin a bei let a ni," tiin a sawi. Zelenskyy tea brand chu Assam CTC leh orthodox tea chawhpawlh, thingpui chak leh tui tak a nih thu a sawi. Assam tea an chawilar rual hian khawvela remna leh muanna a awm an duhna thuchah pawh an thehdarh nghal duh tih a sawi a ni.

Russia hi Indian tea laluttu ram lian ber niin, kum 2021 khan kg mtd 34.09 a la lut a, Ukraine hian hemi kum hian Indian tea hi kg mtd 1.73 vel a lalut ve bawk.