Meeting-ah CM post chungchang ngaihtuah a ni lo - Manipur BJP leader

Manipur-a caretaker chief minister N Biren Singh chu BJP sorkar tharah Chief Minister atan ruat chhunzawm leh nia report a awm hnuah, Manipur works minister hlui leh BJP leader Th Biswajit Singh chuan central-a an party hotute nena meeting an neihah CM post chungchang hi ngaihtuah tel a ni lo tih a sawi ve leh.

Manipur assembly inthlanah BJP hi party mala sorkarna siam thei turin a chak a, mahse party chhungah hruaitu dinhmun inchuhna hi a awm nia sawi a ni. Inthlan result puan aṭanga kar khat liam hnuah pawh CM tur hi an la puang thei lo a ni.

Caretaker CM Singh, state BJP chief A Sarda Devi leh Biswajit Singh-te hi New Delhi-a kalin party hotute an hmu a, sorkar thar siam dan tur chungchangte an sawipui a ni. Meeting zawh hnua Manipur lama an kir hnuah, media ṭhenkhat chuan N Biren Singh hi a term hnihna atan CM-ah awm leh tura thlan a nih thu an report a ni.

"New Delhi-a Meeting-ah hian inthlan neih tak thlir letna leh kan chak dan chungchangte chauh kan sawi ho a ni. Media lam hian CM post hi an rinthu an sawi mai mai a ni," tiin Biswajit chuan a sawi. Hemi rual hian party chhunga CM post chungchangah inhruipawhna a awm nia sawi chu thu dik lo a nih thu a sawi bawk.

BJP chuan Manipur-a BJP sorkar thar siam tur chungchang ngaihtuahpui turin, central observer atan union finance minister Nirmala Sitharaman leh justice minsiter Kiren Rijiju te a ruat tawh a ni. Mahse Manipur-a an kal hun tur hi official-in an la tarlang lo.