Nagaland Assembly budget session nei mek

Nagaland Legislative Assembly chuan Inrinni liam ta khan budget session nei ṭanin, March 25 thleng a awh ang. Assembly kal meka budget session hnuhnung ber tur a ni.

Session ṭan ni hian governor Jagdish Mukhi chuan thu a sawi a, member-te chu Naga political issue chinfel a nih thuai theihna atana United Democratic Alliance (UDA) hnuaia eptu awm lohna ṭangrual sorkar an din avangin a fak. Governor chuan eptu awm lohna sorkar din chu thil ropui tak, legislator-ten thil dang zawng aia an state leh state mipuite ṭhatna tur an dah pawimawhzia a tilang a ni, a ti.

Finance changtu, chief minister Neiphiu Rio chuan naktuk, March 22 ah kum 2022-23 atana state budget a pharh ang. Hei hi eptu awm lohna, ṭangrual sorkar hnuaia state budget pharh hmasak ber tur a ni.

SIT-in Oting inkahna thleng chhui zo tawh
Assembly-a thu a sawiah, Governor Mukhi chuan nikum December thlaa Oting khuaa security force-ten civil mite an kah chungchang chhuitu, Special Investigation Team (SIT) chuan an thil chhui chu an zo tawh tih a sawi.

Oting khuaa thil thleng chuan state mipuite chauh ni lo, India ram hmun danga mite pawh a ti thinur hle tih Governor chuan a sawi a, mitthi chhungte tawrhna tiziaawm thei turin sorkar chuan theihtawp a chhuah a ni, a ti. Thi chhungte hnenah zángnadawmna pek an ni tawh a, hliam tuarte inenkawlna senso pawh peksak an ni, a ti.

State sorkarin Oting khuaa thil thleng chhui tura a din, SIT bakah hian Indian Army lam pawhin chhui chiang tur hian Court of Inquiry a din ve bawk a, anni pawh an thil chhui hi an zo hnai tawh tih Governor chuan a sawi bawk.