Biren Singh leh Biswajit Singh-te Delhi ah kal leh

Manipur caretaker chief minister N Biren Singh leh senior BJP MLA Th Biswajit Singh-te chuan Inrinni liam ta khan a hran ve vein central lama an party hruaitute hmu turin Delhi an pan leh.

Manipur-ah hian BJP-in sorkar thar siam dawn mah se, chief minister tur hi thlan fel a la ni lo. Inthlan result puan hnu lawk, March 15 khan Biren Singh leh Biswajit Singh bakah state BJP president A Sharda Devi-te chu Delhi ah kalin party hotute an hmu a, March 17 ah Imphal-ah an kir leh a ni. An haw hnu hian media report thenkhat chuan Biren Singh hi Chief Minister atan thlan nawn leh niin an tarlang a, mahse Biswajit Singh chuan meeting-ah hian inthlan result thlir letna chauh neiin, chief minister post chungchang ngaihtuah tel a ni lo tih a sawi.

Inthlan result puan a nih aṭanga hun eng emaw chen a liam hnuah pawh Chief Minister tur hi tihfel a la ni lo a, party chhungah CM atana Biren Singh leh Biswajit Singh duhtute inkarah inhruipawhna a awm nia sawi thawmte pawh a awm. BJP Parliamentary Board in CM tur hi a thlang dawn a ni.