Kaziranga National Park tlawh turin Askhay Kumar sawm

Kaziranga National Park thuneitute chuan Bollywood star, Akshay Kumar chu ramsate paradise, Kaziranga tlawh turin an sawm.

Akshay Kumar hian National Park tan cheng vaibelchhe khat a pe a, a thilpek avanga an lawmna lantirna atan park tlawh tur hian thuneitute chuan an sawm a ni.

KNP thuneitute chuan Akshay Kumar-a ṭanpuina pek hmang hian high land, floating camp, anti-poaching camp-te siam a nih bakah, wetland cheiṭhatna atante hman a ni tih an sawi. Kaziranga Park tlawh tura sawm a ni chu lawmawm a tih thu leh, a tlawh ngei tur thu Kumar chuan a twitter-ah a tarlang ve nghal bawk.

Kum 2019, July thlaa Assam-a ruahsur nasa avanga tuilianin Kaziranga Park-a harsatna hrang hrang a thlen avang khan, Park-a ramsa awmte chhanchhuah hna thawhna atan Kumar hian CM Relief Fund-ah cheng vaibelchhe khat a pe a ni. Midang pawh ṭanpui hna thawk tur hian a sawm kual bawk a ni.