Hri len laia damdawiin-ina an luh duh loh vangin nu 61 leh nau piang hlim 877 an thi : Meghalaya sorkar

Meghalaya sorkar chuan National Human Rights Commission (NHRC) hnena report a thehluhah, Covid-19 hri len zual lai khan hri an kai hlauh vanga damdawi-ina an in admit duh loh vangin nu 61 leh nau piang hlim 877 an thi niin a sawi.

Hri leng laiin Meghalaya-ah nu leh nau piang hlim thi an tam hle tih NHRC chuan a sawi hnuah, state sorkar chuan report hi a thehlut a ni.

NHRC-a report thehluhah hian Meghalay sorkar chuan, "Nau piang hlim thihna chhan hi zirchian niin, an pian hlima damdawi lama enkawlna pek ṭhat loh vang a ni. An nute hian Covid-19 hri kai an hlauh vang te, Covid-19 test neih an duh loh vang tein damdawi-inah hian nau nei tur hian an lut duh lo a ni," tiin a tarlang. Heng nausente thihna thlen tam zual lai hi hri len zual lai, a darh tur venna atana damdawi-in lut turte Covid-19 test neih tir vek an nih hunlai a ni tih a tarlang bawk.

Health facility-te an tlawh duh lo chungin, heng nu naupai laite hi ANM leh ASHA te chuan an inah tlawhin, an hriselna dinhmunte pawh an enfiah sak fo a, damdawi-ina nau nei tur pawhin an ngen fo tih sorkar report chuan a sawi. Nau chunga thi leh, naupiang hlim thi an tam avang hian state sorkar pawhin 'rescue misison' siamin, health team chu nu, naupai laite zawngchhuak a, an chungah chhiatna leh harsatna a thlen lohna tura enkawl leh ven an nih theihna turin mobile application-ah ziah lut vek tura tih an ni, tiin sorkar chuan a sawi. Naupai lai zinga dinhmun ṭha lo lutukte chu in lamah nau an neih phalsak an ni tawh lo a, an nau neih hun hma kar hnih velah damdawi-ina in admit vek tura tih an ni bawk.