Hna siambelhna turin Manipur CM in State Cab Service tlangzarh

Manipur sorkar chuan state chhunga ṭhalaite tana hna siam belhna tura an hmalakna kawng khat atan Manipur Cab Service an tlangzarh.

Cab service hi Chief Minister N Biren Singh chuan Imphal-a Manipur State Film Development Society Hall, Palace Compound-ah Thawhlehni khan a tlangzarh a ni.

Manipur cab service thar hi Imphal Finance Co-op Thrift & Credit Society Ltd. thuneihna hnuaia awm a ni.

CM N. Biren Singh chuan Manipur ṭhalai hna nei lo te chuan talent leh theihna ṭha tak tak an nei tih a sawi a, sorkar hmasa khan hmalak dan tur an hre lo mai niin a sawi. Sorkar hmasa chu beih chhunzawm­in ṭhalaite tana hna siam loah a puh a, an sorkar hnuaiah chuan mi zawng zawngin thawhchhuah an neihna turin hma an la dawn tih a sawi.

CM chuan an sorkar chuan mipuite chu khawvel zau zawka an theihna leh talent-te pho chhuak turin hmun an pe ṭha tawk niin a sawi a, entreprenuer-te tiphur turin Manipur Start-up Policy an kalpui mek tih a sawi bawk.

Singh chuan report in a tarlan dan chuan entreprenuer 4000 vel Start-up Policy second phase-ah khan an inziak lut tih sawiin chu chu an state tan chuan thu hriat lawmawm tak a nih thu a sawi a ni. Hetianga kum li kum nga a kal zel anih chuan Manipur chu rei lo teah fully employed state a ni thei dawn a ni, a ti.