AP MP-in sipaite chet dan vangin PM lehkha a thawn
Arunachal Pradesh aṭanga Lok Sabha MP Ninong Ering chuan Prime Minister Narendra Modi hnenah lehkha thawnin Longding District-a Longkhjon thingtlang khuaa sipai-te chet dan mawi lo tak chungchang a ziak a, boruak muanawm awm tura hma la turin a ngen bawk.
Ering chuan Prime Minister hnenah Longkhjon khuaah hian mi 23 chu November 18 khan sipai-ten kut an thlak tih a hrilh a, heng zingah hian puithiam pawh a tel ve niin a sawi. Thingtlang khaw mi pawisawi lo te chu kut an thlak nia sawiin hmeichhia pawh an zuah chuang lo tih a sawi a, hei hi human rights palzutna lian tak niin a sawi bawk.
LS MP chuan sipaite hian he khuaa hma an lak dawn hian police-te pawh an hruai loh thu leh district thuneitute pawh an hriattir lo tih a sawi a ni. November 14 pawh khan thingtlang mite chu silaia tin chungin hel ruangte chu Ronghua khuaah an zawn tir tih a sawi bawk.
Mipuite chuan an hlau hle tih sawiin hel nen pawh inzawmna an nei lo tih a sawi bawk a ni. Sipai-te leh NSNC hel te inkarah mipuite chu dinhmun hrehawm taka an awm thu a sawi.