Assam-ah Autonomous State ngiat chhunzawm

Union Home Minister Rajnath Singh-an Assam-a Bodo-tena state hran an ngiat chungchanga inbiakna neihpui tura Bodo hruaitute a sawmnaah Autonomous State Demand Committee (ASDC) president Holiram Terang chuan Karbi Anglong leh NC Hills-a Autonomous State din chungchang sawipui turin ASDC-te chu sawm ve turin a ti.

Holiram Terang chuan ASDC Central Committee office-a press conference-ah Karbi Anglong leh NC Hills-te hian Autonomous State hi kum 30 chhung an ngiat tawh thu sawiin, sorkar laipui chuan tun thlengin an la ngaihthah hle tih a sawi.

Karbi Anglong leh NC Hills mipuite chuan ram danpuia awm ngei thil bak an ngiat lo tih sawiin sorkar laipui chu tlang mite laka "pick and choose’ policy” an kalpui avanga an dem thu a sawi a ni.

Union Home Minister Rajnath Singh chuan Bodoland state hran ngait tute hi inbiakna neihpuiah November 19 khan a sawm niin Terang chuan a sawi.

Terang chuan Parliamentary inthlan hma lawk khan BJP chuan Autonomous State chungchang an sawichhuak tih a sawi a, tunah erawn an ngaihtuah duh lo niin a sawi bawk.

ASDC president chuan ASDC hruaitute chu Autonomous State chungchanga inbiaknaah hian an tel ve ngei tur a ni, a ti.