Manipur hi ‘land of gems’ a ni: Sitharaman

Union Minister of Defence Nirmala Sitharaman chuan Nilaini khan Manipur Sangai Festival – 2018 hawnna Hapta Kangjeibung, Imphal East district-ah neiin Manipur chu ramchhung state hrang hrang zinga lunghlu(gem) a nih thu a sawi.

Manipur chu state mawi tak a nih thu sawiin Loktak Lake bakah ramngaw leh hmun mawi tak tak awmna hmun anih thu a sawi a, culture leh tradition nghet tak nei an nih thu sawiin chaw pawh chi hrang hrang an nei tih a sawi a ni.

Manipur culture leh tradition chu fakin Defence Mi­nis­ter chuan Mani­puri-te chuan an hman tihdan phung pawh an la hloh lo tih a sawi a, Manipuri dance phei chu hmuhnawm a ti hle niin a sawi.

Manipuri hmeichhia-te chuan society-ah dinhmun pawimawh tak an chelh tih a sawi bawk.

Manipur Governor Najma Heptulla pawhin he hun hi hmanpuiin Manipur Sangai Festival chu national event a nih tawh thu leh Manipur culture hmun laili chantir tu a nih thu a sawi a ni.

Chief Minister N. Biren Singh pawhin Manipur Sangai Festival chu mipuite festival a nih tawh thu a sawi.

Deputy Chief Minister Y. Joy­kumar Singh, Cabinet Minis­ter-te, Rajya Sabha MP, MLA, Chief Secretary, DGP, officer pawimawh tak tak bakah Police, Paramilitary, Army leh Assam Rifle-te pawh he hunah hian an tel a ni.