Manipur CM term hnihna atan Biren Singh lalut

N Biren Singh chu nimin tlai dar 3 khan a term hnihna atan Manipur Chief Minister atan rinawmna thu tiamtira lakluh a ni.

Manipur assembly inthlanah BJP-in party mala sorkarna siam thei tura hnehna an chan hnuah, Chief Minister tur hi thlan fel a nih mai theih loh avangin hun eng emaw chen sorkar thar pawh siam thei loin an awm a ni.

Central lama BJP hruaitute chuan Manipur-a sorkar thar din dan tur leh, Chief Minister tur thlanpui tur hian observer atan union finance minister Nirmala Sitharaman an ruat a, co-observer atan union minister Kirej Rijiju ruat a ni bawk.

CM atan hian Biren Singh bakah Biswajit Singh leh Yumnam Khemchand-te hming sawirik a ni a, Inrinni liam ta khan an pathum hian Delhi-ah kalin party hotu lute an hmu a ni. Hemi hnu, Pathianni khan Sitharaman leh Rijiju-te chu Manipur khawpui, Imphal-ah kalin, Nirmala Sitharman chuan BJP member-te chuan lungrual takin N Biren Singh chu CM term hnihna chelh turin, BJP legislature party leader atan an thlan thu a puang ta a ni. Hemi hnu hian Biren Singh hian governor L Ganeshan hmuin, sorkar a siam theih thu hi a hrilh nghal a ni.

Kum 61 mi, N Biren Singh hi footballer hlui a ni a, Border Security Force-ah lutin, BSF team tan a khel ṭhin. BSF a chhuahsan hnuin chanchinbu lam a enkawl leh a ni. Training leh experience mumal a nei lo chungin kum 1992 khan chanchinbu, Naharolgi Thoudang siamin, kum 2001 thlengin editor a ni. 

Kum 2002-ah politics-ah lutin, inthlana chuh ṭum khatnaah Heingang assembly constituency aṭangin thlan tlin a ni. He bialah hian kum 2007 khan Congress ticket-in thlan tlin nawn a ni leh a, kum 2012 thleng minister-ah dah a ni zui bawk. Kum li hnu, kum 2017-ah BJP a zawm a, Heingang bialah bawk BJP ticket-in a tling leh a, BJP kaihhruai sorkarah Chief Minister-ah a awm zui a ni.

Chief Minister term khatna a chelh chhung hian Biren Singh hian mipuite pual programme eng emaw zat a siam hman a, heng zingah hian 'Go to Hills', 'Go to Villages' leh mirethei puala health scheme siamte a tel. Heng programme a siamte hi central lama party hruaituten inthlan campaign-naa sorkar hlawhtlinna an tarlan langsar zingah pawh an tel a ni.

Seat 70 awmna, Manipur Assembly-ah hian BJP chuan member 32 a nei a, member paruk nei JD(U), member pahnih nei Kuki People’s Alliance bakah independence MLA pahnih chuan BJP sorkar hi an thlawp tur thu an sawi.