Assam CM hoin Kaziranga-a animal corridor siam dan tur sawiho

Assam chief minister Himanta Biswa Sarma chuan Pathianni khan a cabinet member leh top official-te nen meeting neiin, Kaziranga National Park-a animal corridor siam rawt chungchang an sawiho.

CM Sarma chuan meeting-ah hian Park chhunga ramsate chetvel awlsamna tura corridor pakua siam rawtna chu uluk taka ngaihtuah a nih thu a twitter-ah a tarlang.

March 16-a state assembly-ah National Highway 37 kaltlanga Kaziranga leh Karbi Anglong inkara animal corridor siamna tur hmun pakuate thlan a nih thu hi sawi a lo ni tawh a, heng zinga pahnih Golaghat district-a Bokakhat revenue circle hnuaia awm niin, a bak chu Nagaon district-a Koliabor revenue circle hnuaia awm an ni.

Ramsate hian national highway-te him taka an kaltlang theihna turin, kumin state budget-ah khan km 35-a thui four-lane road, tunnel siam tel nghalna tur chu dah tel a lo ni tawh a ni. Hemi atan hian Rs vbc 4,865 ruahman a ni.