Assam SBI official thah thubuaiah Mi pathum man leh

Assam-a Kamrup police-te chuan Zirtawpni khan senior bank official Junu Sarma thah thubuai kalzelah state chhung hmun hrang hrangah mi pathum an man leh.

Bank official Junu Sarma hi October thla khan office aṭanga a haw lam chu Agiyathuri-ah thah a ni.

Sarma thah a nih thubuaiah hian a hma in mi panga man an lo ni tawh a, man zingah hian a driver pawh a tel ve a ni. Sarma thah a nih chhan chhuichiang tute chuan bank loan department-a thil fel lo awm hliahkhuhna atan Sarma hi thah a nih thu an sawi.

Juju Sarma hi State Bank of India Dadara branch-a deputy manager a ni.

Kamrup Police official chuan state chhung hmun hrang hrangah mi pathum- Arup Das, Ajanta Kalita leh Puja Das-te chu Sarma thah thubuaiah hian an man thu a sawi, Arup phei chu ULFA hel pawla mi a nih ṭhin thu sawiin nikum khan hel pawl hi a chhuahsan thu a sawi. 9mm pistol pakhat leh silai mu round nga an man tel thu a sawi bawk.

Arup hi Nalbari district-a Tihu-ah an man thu a sawi a, Ajanta leh Puja-te hi chu Hajo leh Kamrup-ah man an ni ve thung.

Police-te sawi dan chuan a hmaa an lo man tawh, Putul Ali, loan recovery agent chuan Sarma that tur hian Arup hi an ruai a, cheng nuai 5 an pe niin an sawi a, an la chhuichian zel dawn thu an sawi bawk.