AR sipaite'n AP-ah NSCN hel nia hriat 2 kaphlum ; Tualchhung mite'n thi zinga 1 civil mi niin an sawi

Assam Rifles sipaiten Arunachal Pradesh-a Tirap district-ah National Socialist Council of Nagaland-Isak-Muivah (NSCN-IM) hel nia hriat pahnih an kaphlum a, hel pakhat manin a kut aṭangin silai leh a mu an man tel bawk niin Assam Rifles official-ten an sawi.

He inbeihna thlenna hmun Tirap district headquarters, Khonsa aṭanga km 25-30 vela hla, Old Kolagoan khaw bulah niin, Pathiannia thleng kha a ni.

6 Assam Rifles commanding officer, Col AK Das chuan, "NSCN-IM helte an awm tih thu dawn a nih avangin, security force-te chuan Pathianni chawhma dar 11 vel khan Old Kolagoan leh New Kolagoan khaw inkar ramhnuaiah an va zawng nghal a ni," a ti. Mi panga hmuin, assault rifle-te nen an lo awm a, sipaite hian inpe tura an tih chuan anni hian an lo kap nghal ta mai niin a sawi. Sipaite hian kap let vein, an zinga pahnih an kaphlum a, pakhat an kap hliam bawk. An kahhlum pakhat zawk hi NSCN-IM-a self-styled corporal niin a sawi.

Hetih lai hian tualchhung mite chuan sipaiten an kahhlum pakhat zawk, Retto Kakho leh hliam tuar, Pakngam Lowang te chu civil mi, helpawl nena inzawmna nei lo an nih thu an sawi thung. Kakho hi Old Kalogaon khuaa panchayat hruatu hlui, khawtlang hruaitu a ni a, NSCN nen inzawmna engmah a nei lo a, amah ang bawkin Lowang pawh hi hel nena inkungkaihna nei lo a ni tih an sawi.

All Tirap District Students’ Union (ATDSU) general secretary Priyang Pumoh chuan Khako leh Lowang-te hi NSCN-IM helte hian local guide atana hman tura an hruai luih a ni tih a sawi bawk. Thawhṭanni khan NSCN-IM laka lungawi lohna lantirin Khonsa leh Deomali-ah ATDSU leh zirlai pawl dangten rally an huaihawt, an nawrh huaihawt hi All Arunachal Pradesh Students' Union leh North East Students' Organisation pawhin an thlawp a ni.

Pumoh chuan Kakho chhungte hnena zángnadawmna pek tur leh, a fate lehkha zirna kawnga pui tura an phutna chu Assam Rifles CO hnenah an thehlut tih a sawi a, sipai lam hian inquiry report an nghak phawt dawn tih an sawi thung.

Tirap district thuneitu chuan Tirap district-a thil thleng chungchang chhui chiang tur hian thupek a tichhuak nghal a ni.