Assam-a private transport-in darkar 48 bandh huaihawt dawn

Assam Motor Workers Association (AMWA) chuan March 28 leh 29 hian state pumah Chakka bandh huaihawt an tum.

AMWA-ah hian motor khalhtute leh motor neitu pawl an tel a ni.

Commercial vehicle khalhtu leh neitute chungah state thuneitute inluling lutuk an duh lohna lantirnan he bandh hi huaihawt an tum tih AMWA chuan a sawi.

Thuchhuah an siamah, Covid hri leng avanga inkharkhip leh khuahkhirhna hrang hrang siam a nih avanga kum hnih chhung commercial vehicle driver leh conductor-ten sum lama harsatna an tawh chungchangah, Assam sorkar chuan chhawmdawlna tur engmah a pe lo niin an sawi. Lockdown avanga hna thawk mumal thei loa hun rei tak an awm hnuah, sorkar chuan motor chhiahte tisangin, sum chawi tur hrang hrang a siamsak zawk niin AMWA chuan an tarlang.

State Assembly-a motor workers welfare scheme, Motor Sharmik Kalyan Asoni chu pharh ni tawh mah se, tun thlengin a taka kalpui a la ni lo tih an sawi bawk.

Darkar 48 bandh huaihawt chhung hian public transport zawng zawng , bus leh taxi pawh huam vekin tumah an tlanchhuak dawn lo tih an sawi. All Assam Cab Operators Assocation chuan bandh hi an thlawp dawn tih an sawi tawh a ni.