Manipur CM Biren Singh hoin cabinet meeting hmasa ber nei

Manipur chief minister N Biren Singh hoin Thawhlehni khan BJP sorkar thar hnuaia cabinet meeting hmasa ber neih a ni.

Biren Singh hi Manipur CM term hnihna chelh tura thlan a nih hnuah Thawhṭanni khan rinawmna thu tiamtir a lakluh a ni a, a rual hian a minister tur pangate pawh lakluh nghal an ni bawk.

Thawhlehnia cabinet meeting hi minister atan lakluh thar - Th Biswajit Singh, Yumnam Khemchand, Govindas Konthoujam, Nemcha Kipgen leh Awangbow Newmai-te nen an nei a ni. Meeting-ah hian Manipur Governor-in Assembly Speaker thlan hun atana March 24, zing dar 9 a rawt chu an pawm a ni. Cabinet chuan Governor hi March 24-ah 12th Manipur Legislative Assembly session hmasa ber tur ko tur leh, hemi ni vek hian Assembly-a thu sawi turin a ngen bawk.

Cabinet meeting hian '100 tasks in 100 days' programme siam pawh pawmin, sorkar thar a din aṭanga ni 100 chhunga hnathawh tur hrang hrangte duan a ni a, hetah hian policy decision, construction leh systemic improvement lamte pawh a tel.

Eirukna laka fihlim state siam a nih theihna atan chief minister' office-a anti-corruptin cell chu tuaithar leh thuam chak an rel a, he cell hi Additional SP rank-in a ho ang. Mipuiten sorkar hnathawk, eirukna leh dik lo taka thiltihnaa inhnamhnawih an hriatte laka complaint an thehluh theihna tur a thlawna biak theihna phone number-te siam a ni dawn bawk.