Assam minister-in Helna bansan turin ULFA (I) hotu thlem

Assam finance minister Himanta Biswa Sarma chuan ULFA (I) commander-in-chief, Paresh Baruah-an helna a bansan chuan Citizenship (Amendment) Bill, 2016 chu sorkar in an hnawl dawn tih a sawi.

North-East Democratic Alliance (NEDA) convener Sarma chuan Paresh Baruah hi a lo let chuan Citizenship hi kan hnawl ang. ULFA leh Bill hian inzawmna an nei lo a, a chhiar pawh an chhiar lo, a ti.

Thuchhuah a siam hnu lawk hian Paresh Baruah chuan chhang nghalin sorkarin inbiakna an neihpui duh a nih chuan a inpeih reng tih a sawi.

Baruah chuan inbiakna an nei hlawhtling a nih chuan Himanta Biswa Sarma chu ‘Swadhin Asom’ (Sovereign Assam) Prime Minister hmasa ber state pum mipuite duh angin a ni ang, a ti bawk.

"Himantan hi mi fing tak a ni. Bill chungchang a sawichhuah duh vang hian hetiang offer hi a siam a ni. Ani ang politics hruaitu hi kan mamawh. Congress-a a awm lai pawh khan Rahul Gandhi hnial ngam kha a ni a, sovereign Assam kan ngiat pawh hi hma min lakpui thei ang." tiin Baruah chuan a sawi bawk a ni.

Biswa Sarma chuan Citi­zenship Bill vangin Assam ṭhalai ten hel an zawm tih chu a pawm loh thu sawi bawkin, Pankaj Pratim Dutta chungchang pawh a sawi chhuak a, Dutta hian Bill chungchanga thu dik lo vangin hel pawl hi a zawm niin a sawi. Dutta hi All Assam Students’ Union (AASU) hruaitu ṭhin a ni a, October thla khan hel pawl hi a zawm a ni.