Thadau Students’ Association-in Tiam chin awm loin bandh huaihawt

Manipur-a Thadau Students’ Association General Headquarters (TSA-GHQ) chuan thu­chhuah siamin 12 Assam Rifles-ten an hruaitu pakhat an sawisak avangin state chhunga na­tio­nal highway zawng zawngah vawiin aṭang hian tiam chin awm loin bandh an huaihawt dawn tih an tarlang.

TSA-GHQ chuan GHQ leh an branch dang­ten inbiakna an neih hnuah thutlukna hi an siam ta tih sawiin, TSA Secretary General, Michael Lamjathang Haokip, November 12-a Sita Lamkhai Check post, Tengnoupal-a 12 Assam Rifles-ten an lo beih avangin bandh hi an huaihawt dawn thu a sawi.

TSA-GHQ chuan thil thlengah hian thuneitute chu buaina chingfel tura an beisei thu sawiin, hetih lai hian Inspector General, Assam Rifles (South) IGAR (S) PRO chuan ni 20 khan an duh loh dan deuha thuchhuah siamin Michael L Haokip chu thiam lo zawkah an puh tih a sawi niin an tarlang bawk.

Inzahna lantir leh rorelna dik, mipui te leh tualchhung mite him tak leh zalen taka an awm chu an thil duh awmchhun a nih thu tarlangin, an thil phut te chu tikhawtlai lo in sorkar laipui leh Assam Rifles thuneitute chuan tihlawhtling nghal se an duh thu an tarlang.

TSA-GHQ-te hian Inspector General, Assam Rifles (South) IGAR (S) PRO thuchhiah siam hi hnukdawk leh turin an ngiat. Thu belhchian dawl lo leh dawt thu, mipuite rilru hruai khaw lo theih a nih avanga sut leh tura an ngiat thu an sawi a ni. State police-te chu rorelna dik kalpui tura an ngiat bawk thu sawiin dan leh thupek khauh taka kengkawh tura an duh thu an sawi.

TSA chuan an thil phut hi vawiina tihhlawhtlin nghal a nih loh chuan tiam chin awm loin bandh hi an huaihawt dawn tih an sawi a ni.