CM Sonowal-an anti-insurgency operation kalpui turin hriattir

Assam Chief Minister Sarbananda Sonowal chuan Pathianni khan upper Assam-a district pakua-a dan leh thupek dinhmun enfiahna a nei a, official-te chu insurgency operation chu chak taka kalpui turin a ti.

Sarbananda Sonowal chuan dan leh thupek ken­kawh a nih dan chu Superintendents of Police (SP) Golaghat, Jorhat, Majuli, Sivasagar, Charai­deo, Dibrugarh, Tinsukia, Dhemaji leh Lakhimpur district-te nen meeting an neihnaah an sawiho a, he hunah hian DGP bakah Army leh paramilitary force senior official-te pawh an tel.

Meeting zawh hnuah hian Sonowal chuan police, Army leh paramilitary force-te chu inlungrual taka hna thawk tlang tura a fuih thu sawiin district tina SP-te chu mipuite himna ngaipawimawh tura a tih thu a sawi bawk.

District 26 leh civil sub-division 14-a panchayat inthlan awm turah pawh SP-te chu inthlanna dik leh felfai neih a nih theihnan-a hma la turin a ti a ni.

Chief Minister chuan Assam mipuite chuan muanna an duh thu leh, sorkar laipui leh state sorkar chuan hma an la reng tih sawiin Assam hmasawnna tur pawhin hna an thawk tih a sawi bawk.

ULFA(I)-te chuan upper Assam lamah hian hma an la nasa hle a, November 1-a Tinsukia district-a mi panga kah­hlum pawh khan ULFA(I)-te tih a nih rin a ni bawk. Hemi anih avang hian venhimna hi uluk leh zuala kalpui a ngai niin CM chuan a sawi.

DGP Kuladhar Saikia chuan ULFA(I) leh hel pawl dang laka hma an lakna pawh chak lehzuala kalpui a ngaih thu a sawi a ni.

DGP chuan village headman-te leh tualchhung mi pawimawh te hnen aṭangin ULFA hel pawl zawm zat hre tura hma an lak thu a sawi bawk a ni.