April 19-ah Guwahat civil poll nei dawn

Assam state election commissioner Alok Kumar chuan April 19-ah Guwahati Municipal Corporation (GMC)-a ward 60-ah inthlan neih a ni dawn tih a puang.

Inthlana chuh tumte tan March 30 thleng nomination paper a thehlut theih a, April 1-ah document-te enfiah a ni dawn a, inhnuhdawk duh tan April 4 thleng hun hawn a ni ang. April 19-ah vote thlakin, result puan hun tur chu April 21-ah a ni.

GMC-a ward 60-a hian vote thlakna tur polling station 789 a awm dawn a, vote nei mi 7,96,829 awmin, an zinga hian hmeichhia 3,99,911, mipa 3,96,891 leh third gender 17 an awm.

Polling station tinah vote thlakna atan electronic voting machine (EVM) hman vek a ni dawn a, inthlanna felfai tak neih a nih theihna turin theih angin hma lak mek a ni, tiin Kumar chuan a sawi.

Ward 60 zingah hian Scheduled Castes tan ward pahnih, Scheduled Castes (Women) tan ward pahnih, Schedule Tribe tan ward pakhat, Scheduled Tribes (Women) tan ward pahnih bakah general women tan ward 26 dah a ni a, a bak ward dang chu tupawhin chuh theih a ni.

Inthlanna neih tura star campaigner neih theih zat pawh tihfel nghal niin, recognised national party tan 30, recognised state political party tan 25 leh registered unrecognised party tan 15 bithliah a ni.