Meghalaya Minister-in UGC thutlukna state zirlaiten an tuar dawn tih a sawi

Meghalaya education minister Lahkmen Rymbui chuan University Grants Commission (UGC)-in Common University Entrance Test (CUET) neih vek tura thutlukna a siam chungchangah, test hi NCERT textbook behchhana neih a nih dawn vangin an state zirlaiten an tuar dawn niin a sawi.

Tun hnaiah UGC chuan he thutlukna a siam hi a puang a ni. Rymbui chuan an thutlukna siam hi thil ṭha tak ni mah se, NCERT textbook behchhana zawhnate siam a nih dawn avangin state board candidate-te tan a buaithlak dawn a ni, a ti. Meghalaya chauh ni lo, state danga board zirlaite pawhin harsatna an neih phah dawn tih a sawi bawk.

"Thingtlang lama zirlai, facility nei ṭha lote chuan he thutlukna hi an tuar bik thei dawn a ni. Tun hmaa sorkar laipuiin JEE kaltlang veka admission tih tur a tih khan, zirlai tam tak chuan JEE exam an paltlang theihna atan coaching te an kal a lo ngaih phah tawh a ni," a ti. Tuna UGC thutlukna siam thar vang hian zirlaiten coaching centre an pante a ngai leh dawn a, centre pan ve thei lo zirlai rethei zawkten an tuar dawn a ni tiin a sawi. Hemi rual hian sorkar chuan zirlaite an buai lohna turin a theih angin hma a la zel dawn tih a sawi nghal bawk a ni.