Assam : Sorkar hnathawkten phalna nei loin an awmna district chhuahsan thei lo

Assam sorkar hnuaia hnathawkte chu thuneitu sang lam aṭanga phalna nei loa an hnathawhna, an post-na district aṭanga an kal chhuah chuan suspend hial an tawk thei dawn a ni.

Chief minister Himanta Biswa Sarma chuan state assembly neih mekah he thu hi sawiin, "Sorkar hnathawkte chuan an hna thawhna district pawn lama an kal dawn a nih chuan Deputy Commissioner hnenah phalna an lak zel a ngai tawh dawn a ni," a ti.

CM Sarma chuan sorkar hnathawk tam tak, an post-an district-a awm lo a, district dang aṭanga va kal ṭhin an awm tih hriat a nih thu a sawi a, hetianga an post-na district chhunga awm duh lo chu hnathawktu rintlak tak an ni thei lo, tiin a sawi. "Sorkar hnathawk, an post-na district ni lo, district danga an bazar lai video hmuh a nih pawhin suspend theih reng an ni ang," tiin a sawi.