Tripura: Police silai hmehpuahah nawrh huaihawt zinga pakhat thi

Tripura-a Bengali leh Mizo organisation intel­khawm, Joint Movement Committee-in Bru raltlante a hlawma Kanchanpur subdivision chhunga state sorkarin dah a tumna duh lohna lantira nawrh an huaihawt mekah, Inrinni liam ta khan police-te nen innawr buaiin police-te silai hmehpuaha an zinga pakhat a thi. 

Nawrh huaihawtte leh police-te intihbuainaah hian mi 23 in  hliam an tuar a, an zinga pasarih chu civil mi niin, police leh fire service mi 15 an tel. 

JMC convener Sushanka Bikash Barua chuan Inrinni khan JMC member-te hian lungawi lohna lantirin hmun pathum, Chamtilla, Pecharthal leh Panisagar market area-ah kawng an dang a, kawng dantute hi Tripura State Rifles (TSR) jawan pakhat chuan silaiin a pawng kah niin a sawi. Silai muin a fuh zinga mi, Srikanta Das (46) chu damdawi-in panpui a nih hnuin a hliam tuar loin a thi tih a sawi bawk. 

BJP kaihhruai Tripura state sorkar chuan nawrh huaihawtte silaia kah an nih chungchang hi chhui chiang turin thupek a tichhuak nghal a, thi chhungte sorkar­in cheng nuai ngain a ral dawn tih a sawi bawk. 

Law minister Ratan Lal Nath chuan North district magistrate Nageh Kumar B chu magisterial level inquiry ti tura hriattir a nih thu leh ,thla khat chhunga report thehlut tura hriattir a ni tih a sawi. 

Nath chuan, "He thil thleng avang hian Chief Minis­ter chuan deputy minister, director general of police leh additional director general of police-te meeting a neihpui nghal a ni," a ti. 

Hetih lai hian additional director general of police (ADG) (Law and order) Rajiv Singh chuan nawrh huaihawtten an beihnaah police mi leh sa eng emaw zatin hliam an tuar tih a sawi a, nawrh huaihawtte hian security force-te hi beiin an ralthuamte laksak an tum a, hei vang hian kawng dang an nei lo niin a sawi. Police hliam tuar zinga ṭhenkhat chu Agartala-a GBP hospital-a enkawl tura refer an nih tih a sawi bawk.

JMC hian state sorkarin Bru raltlante a hlawma Kanchanpur subdivision huam chhunga inbenbel tir a tum chu an duh lo a, a hlawma dah loa hmun hrang hranga sem darh an phut a ni. Sorkar nawrna atan hian kar liamta Thawhṭanni aṭang khan tiam chin awm loin nawrh an huaihawt a ni.