Nagaland RS MP atan chuhtu awm loin S Phangon Konyak tling

Nagaland Rajya Sabha member atan S Phangon Konyak chu chuhtu awm loin a tling tih Ningani khan puan a ni a, Nagaland Rajya Sabha member atana hmeichhe tling hmasa ber a ni.

Ningani kha RS inthlan neih tura candidate-te inhnuhdawh theih hun tawp a ni. Inthlan hi March 31-ah neih tura tih nih mah se, chuhtu dang an awm loh avangin returning officer, Nagaland Legislative Assembly-a returning officer Khruohituonuo Rio chuan S Phangon Konyak chu tlingah a puang.

Nagaland RS member ni lai, KG Kenye term hi April 2-ah a tawp tawh dawn a ni.

State unit BJP mahila morcha president, Konyak hi Nagaland hmeichhia zinga parliament member ni thei pahnihna a ni dawn a, kum 1977 khan Lok Sabha member atan Rano M Shaiza chu thlan tlin a lo ni tawh. Dimapur-a Holy Cross Higher Secondary School aṭanga a zirchhuah hnuah, Delh iUniversity-ah zir zawmin, English Literature-ah master degree a nei a ni. Zirlai a nih laiin Konyak hi zirlai pawl lamah pawh a inhmang a, kum 2017 khan BJP a zawm a ni.

Nagaland chief minister Neiphiu Rio chuan Konyak chu lawmpuina leh duhsakna hlanin, an state tan ṭha takin a thawk ngei dawn tih a ring nghet tlat tih a sawi.

Hmarchhak state pahnih - Assam leh Tripura-ah March 31 hian Rajya Sabha inthlan hi neih a ni ang.