Tripura-in border haat pathum siam belh tum

Tripura industries and commerce minister Manoj Kanti Deb chuan Bangladesh nena an insumdawn tawnna tihlenna turin, state sorkarin border haat pathum siam belh a tum tih Assembly inkhawmah a sawi.

CPI(M) MLA Nirmal Biswan zawhna a chhannaah, minister Deb chuan border haat siam tur zingah Dhalai district-a Kamalpur-Kurmhaghat border-a siamna tur lungphum chu phum a ni tawh a ni, a ti. Hei bakah hian North Tripura district-a Raghna-Paulbasti border leh, Khowai district-a Belcherra-Nalua Tea Estate border-ah pawh lungphum phum thuai a ni ang, a ti.

Tripura-ah hian border haat hi Sepahijala district-a Kamalasagar leh South Tripura district-a Sringar-ahte a awm tawh a ni. Mahse Covid-19 hri leng vangin a pahnih hian khar a ni a, tualchhung mite chuan thuneitute hnena hri leng dinhmunin ziaawm lam a pan tawh avangin Bangladesh lam nena joint meeting nei a, heng border haat pahnihte hi hawn dan ngaihtuah turin an ngen.

Border haat siamna atan hian Rs vbc 5.30 vel sen a ngai a, union ministry of commerce and industries chuan border haat pakhat siamna atan hian Rs vbc 2.50 a sanction tlangpui ṭhin.