NRC List ennawn tura ngenna Assam-in thehluh a tum

Assam sorkar chuan kum August, 2019-a tihchhuah, National Register of Citizens (NRC) List ennawn leh tura ngenna chu Supreme Court-ah thehluh a tum.

State agriculture minister Atul Bora chuan Ningani khan Supreme Court-a petition thehluh an tum thu hi sawiin, "All Assam Students’ Union (AASU) leh pawl dangte nena meeting neihah he thutlukna hi siam a ni. Kum 2019-a NRC list tihchhuah hi kan pawm thei lo a, hei vang hian ennawn turin kan ngen dawn a ni," a ti.

AASU advisor Samujjal Bhattacharya chuan NRC list-ah hian Bangladesh mi, dan loa an state-a lut mi tam tak telh an ni tih a sawi. Dan loa lutte telh an duh loh thu sawiin, a hma pawhin Supreme Court-ah petition an lo thehlut tawh a, sorkar laipui leh state sorkar pawh Supreme Court-ah NRC siamṭha tura ngen tur pawhin an lo nawr tawh tih a sawi.

Kum 2019-a sorkarin NRC final list a tihchhuahah khan Assam mi leh sa, mi nuai 19 chuang hming telh hmaih a ni a, hetih lai hian Bangladesh aṭanga dan loa lut mi eng emaw zat telh an ni thung nia sawi a ni. Final list-ah hian NRC diltu mi vaibelchhe 3.29 aṭangin mi vaibelchhe 3.11 hming dah a ni. List-a tel lote hi Foreigners' tribunal-ah an appeal phalsak an ni.

NRC list-a tel lo, mi nuai 19 velte hian tun thlengin Aadhaar card an la dawng ve thei lo a, hemi chungchang hi Assam sorkar pawhin sorkar laipuiiah thlen a tum bawk. Assam-a hian Aadhar card la nei lo hi an vaiin mi nuai 27 vel an la awm a ni.