Assam leh Meghalaya CM-ten March 29-ah Amit Shah hmu dawn

Assam leh Meghalaya chief minister-te chuan March 29 hian union home minister Amit Shah an hmu dawn a, he hunah hian state pahnihte ramri buaina an neih mek zinga hmun paruka inremna tur an ziak fel tawh dawn a ni.

Meghalaya chief minister Conrad K Sangma chuan ministry of home affairs (MHA) aṭangin meeting an neih tur hi official-a hriattir an ni tih sawiin, March 29 tlai dar 4.30-ah Amit Shah hi an hmu dawn tih a sawi.

State pahnihte hian hun eng emaw chen ramri hmun paruka buaina chinfel dan tur hi an buaipui tawh a, a thuphungin inremna pawh an siam tawh a ni. Buaina an neihdante enfiah leh zirchiang tura state pahnihin committee an dinten rawtna a siamte chu Assam leh Meghalaya cabinet-te chuan an pawm ve ve tawh a, January 29 khan Assam CM Himanta Biswa Sarma leh Sangma-te hian memoradum of understanding (MoU) ziakin, January 31 khan Amit Shah hnenah hian an thehlut tawh a ni.

Hetih lai hian Meghalaya pawl hrang hrang chuan ramri chinfelna tura ruahmanna an siam dan chu ennawn turin state sorkar hi an la nawr reng thung. CM Sangma chuan ramri chungchanga buaina zawng zawng chu a kaihhruai sorkar chuan chingfel vek thei lo mah se, a tam thei ang chinfel tumin theihtawp an chhuah zel dawn tih a sawi.