Tarun Gogoi dinhmun a ṭha lo
Assam chief minister hlui leh Congress party hruaitu, Tarun Gogoi chu multiple-organ failure avangin a dinhmun a ṭha lo a, Inrinni liam ta aṭang khan ventilator hman tir a ni.
Kum 86 mi, veteran politician hi a hmain Covid-19 a kai avangin enkawl a lo ni tawh a, a hri kai hi enkawl dam ni tawh mah se, a taksa a chak loh chhoh zel avangin November 2 khan Gauhati Medical College and Hospital (GMCH) ah dah luh leh a ni.
Assam health minister Himanta Biswa Sarma chuan Inrinni aṭang khan Gogoi dinhmun hi a ṭha lo hle ti sawiin, thawk lamah harsatna a neih avangin doctor-te chuan ventilator an hman tir tih a sawi.
Health Minister chuan, "Doctor-te chuan damdawi leh medical method hrang hrang hmangin theihtawp an chhuah a, dialysis pawh tihsak an tum a ni," a ti.
Gogoi enkawltu GMCH doctor-te chuan All India Institute of Medical Science (AIIMS), Delhi-a expert-te pawh an bepawh reng tih sawiin, Gogoi hi hmun danga phurh chhuah ngam a ni hrih lo tih a sawi bawk.
August thla khan Gogoi hian Covid-19 a kai tih hriat a ni a, GMCH-ah enkawl niin thla hnih dawn enkawl a nih hnuah October 25 khan a chhuak thei chauh a ni. Mahse damdawi-in aṭanga a chhuah hnuah taksa lamah harsatna dang a neih chhoh leh avangin November 2-ah admit leh a ni.