RTI Activist beihna CBI chhui tir tura ngiatna hnawl

Meghalaya-a eptu pawl ten East Jaintia Hills-a RTI Activist-te beih an nih chungchang chhui hna CBI kuta dah tura sorkar an ngiat chu Meghalaya sorkar chuan an pawmsak lo.

RTI Activist Agnes Kharshiing leh Amita Sangma-te chu November 8 khan East Jaintia Hills-a Shoh Shrieh thingtlang khuaah beih an ni a, Kharshiing phei hi chu a na hle a, NEIGHRIMS-ah uluk taka enkawl zui a ni.

Home Minister, James P.K. Sangma chuan eptu pawl lam ngenna chu pawm­sak a ṭulna a hriat loh thu sawiin state sorkar in chhui chiang tur an ruat tawh tho a, CBI koh luh chu a ṭulna a hriat loh thu a sawi.

James Sangma chuan police-ten an chhuizuina pawh chu a kaltluang hle tih sawiin eptu pawl lam pawh chu dawhtheihna nei turin a ngen nghal bawk a, thutlukna hma taka siam lo turin a ti.

Thawhlehni-a Megha­laya Legislative Assembly special session neihnaa zawhna a chhannaah Sangma chuan he thu hi a sawi a ni.

RTI Activist-te beih an nih chungchangah hian Opposition leader Dr. Mukul Sangma chuan CBI in an chhui a nih loh chuan midang chu an ring zo lo tih a lo sawi tawh a, Congress MLA Himalaya Shangpliang pawhin police-te chuan an chhui muang lutuk tia sawiin a lo sawisel tawh bawk.