Citizenship Bill duh lohna pawl 70-ten lantir leh Assam CM Sonowal-an Rajnath Singh hmu dawn

Hun eng emaw chen chu dodalna a awm ta a, ziaawm lam a pan thei dawn chuang lo niin a lang.

Citizenship (Amendment) Bill, 2016 duh lohna chu hmarchhak hmun hrang hrangah lantir a la ni chhunzawm zel a, Thawhlehni pawh khan Assam state khawpui Guwahati-ah pawl hrang hrang 70-te chuan Bill duh lohna hi an lantir leh.

Thawhlehni-a Bill duhlohna lantirna hi Krishak Mukti Sangram Samiti (KMSS)-te kaihhruaina hnuaia neih a ni a, Meghdoot Bhawan hmaah mi eng emaw zat an pungkhawm a ni.

Assam Jatiyatabadi Yuva Chhatra Parishad president Palash Changmai chuan eng vang mahin an pawl chuan Bill chu an pawm dawn lo tih a sawi a, sorkar in Bill hi a pawm dawn a nih phawt chuan “Gana Satyagraha” chu an chhunzawm zel dawn tih a sawi.

Citizenship Amendment Bill chungchang ngaihtuaha ṭhutkhawmna hnuhnung ber hi nimin chawhnu dar 2 khan Joint Parliamentary Committee (JPC) chuan an nei a, he thu ziah lai thleng hian thuchhuah erawh an la siam lo thung.

Hetihlai hian Assam Chief Minister Sarbananda Sonowal chuan nimin khan Citizenship(Amendment) Bill chungchangah hian Union Home minister Rajnath Singh chu New Delhi-ah a hmu dawn nia sawi a ni bawk.

Citizenship Bill hi tun thlasik session-ah hian Lok Sabha-ah pawm a nih rin a ni a, mahse Upper House lamin an dan chuan dan(law) a ni thei dawn lo a ni.