Guwahati civil poll sawn phutin Congress party-in kawng zawh

Assam-a eptu pawl, Congress party chuan April 19-a Guwahati Municipal Corporation inthlan neih tura ruahman chu, an state-a festival pawimawh ber Rongali Bihu nen a inan dawn avangin sawn an phut.

Inrinni liam ta khan Congress party chuan inthlan sawn phut hian kawng an zawh a ni. Kawngzawhnaah hian Assembly-a leader of opposition Debabrata Saikia leh Congress working president Jakir Hussain Sikdar-te pawh an tel.

Congress state unit president Bhupen Borah chuan an state tana hun pawimawh, Rongali Bihu festival hi hri leng vangin kum hnih an hmang thei tawh lo a, hri leng a ziaawm chhoh tak avangin festival an lawm ve theih dawn ṭuma inthlan nena insutbuai tir a ni chu pawi an tih thu a sawi. Rongali Bihu lawmna hi April 14 aṭangin neih ṭan a ni ang.

Rorel lai, BJP pawhin state election commission hnenah inthlan hun sawn tura ngenna hi an lo thehlut tawh bawk.