BJP-in sorkar hmasa leiba an chhawm ; An chinfel dan tichhuak turin CM hluiin phut

Tripura chief minister hlui, Assembly-a eptu hruaitu ni mek Manik Sarkar chuan an state-a BJP-IPFT sorkar chu sorkar hmasa aṭanga leiba tam tak an chhawm nia an sawi, an chinfel tak dante mipui hriata tichhuak turin a phut.

Tripura-ah CPI(M) kaihhruai Left Front in kum 25 zet ro an relna chu titawpin, kum 2018 khan BJP-IPFT ṭangrual sorkar hi a rawn ding a ni.

Kum 2018, March thlaa sorkar thar an din hnu lawkah, BJP-IPFT sorkar hian sorkar hmasa aṭangin state leiba, Rs vaibelchhe 11,00 zet an chhawm tih an sawi. Hetih lai hian sorkar thar hian an sorkar tirh kum hnih chhung chu Assembly-ah zero deficit budget an pharh thung a ni.

CPI(M) hruaitu, Manik Sarkar chuan sorkar hmasa khan sum hnutchhiah nei lo ni se sorkar thar hian a zawnin kum hnih chhung zero deficit budget a pharh thei lo ang, a ti. State mipuite chuan BJP-IPFT-in sorkarna an siam tirha leiba tam tak an chhawm nghal nia an sawi kha an chinfel dan an hre chak hle a ni tiin, mipui hriata tichhuak turin a phut.

Sarkar chuan state sorkar chuan social pension la zinga mi 50,000 chu list aṭangin a paih niin a sawi bawk. Mi tam tak paih an nih avangin social pension Rs 2000-a a tihpun pawh chuan sum lamah buaina a thlen phah dawn lo a ni,a ti. Hemi rual hian mi singnga vel chuan he hamṭhatna hi an dawng ve thei ta lo thung tih a sawi.