Arunachal Pradesh MP in China leh an state inkar sawichhuak turin ngen
Arunachal Pradesh Lok Sabha MP Ninong Ering chuan Thawhlehni khan Prime Minister Narendra Modi chu G-20 summit neih turah an state leh China inkara buaina awm ṭhin chu Chinese President Xi Jinping nena sawidun turin a ngen.
G-20 Summit hi vawiin leh naktuk hian Buenos Aires, Argentina-ah neih a ni ang.
Congress MP chuan Prime Minister hnena lehkha a thawnah India leh China inlaichinna chu Arunachal Pradesh thlir dan chuan a ṭha lo hle tih sawiin, Arunachal leh China chuan ramri an inṭawm bawk si avangin an ngai thutak hle tih a sawi.
Ninong Ering chuan China in Arunachal Pradesh mipui te tana stapled visa a pek ṭhin chungchang chu thil thar a nih loh thu sawiin sawilan ngei a ṭul tih a sawi, India sorkar chuan an ram chu an venghim tur a nih thu sawiin state mipuite rilru pawh an hneh a ṭul tih a sawi bawk.
China hian Arunachal Pradesh mipuite tan hian an policy angreng deuhin stapled visa an pe ṭhin a, hei hian Arunachal mipui te tan harsatna a thlen nia sawi a ni. Hemi avang hian thlawhtheihna hmanga China-a luh phalsak an ni lo a ni.
Arunachal East constituency MP hian a hma pawhin Chinese ho chungchangah hian Prime Minister Modi hi a lo be fo tawh a, China sipai ten India rama luh an tumna leh kawngpui siam an tum chungchangah te pawh khan PM hi a lo be fo tawh bawk.
Ering chuan India chuan China thiltih dan chu a dodal tur a ni, tia sawiin China chu India ram inpumkhatna leh zalenna zahsak tura chah turin a ti bawk a, Panchsheel agreement pawh zahsak tura chah turin a ti bawk a ni.
India leh China-a Tibet region-te chuan 1954 khan Panchsheel agreement, Five Principles of Peaceful Co-existence tia hriat bawk chu an lo ziak tawh a ni.