Assam CM leh Rajnath Singh-an Citizenship Bill chungchang sawidun

Union Home Minis­ter Rajnath Singh, Assam Chief Minister Sarba­nanda Sonowal leh official pawimawh eng emaw zat chuan Thawhlehni zan khan Assam-a Citizenship Amendment Bill dodalna hrang hrang chungchang sawihona leh enfiahna an nei.

Sarbanada Sonowal leh a minister pui Himanta Biswa Sarma-te chuan Home Minister hnenah hian Assam-a Citizenship Bill duhlohna lantirna nasa taka a thlen thu an hrilh.

Citizenship Bill 1955 siamṭhatna tura bill pharh hi pawm anih chuan Bangladesh, Pakistan leh Afghanistan aṭanga India rama lo lut te chu kum ruk an awm tlin tawh chuan khua leh tui nihna pek an ni thei dawn a, hei hi Assam tualchhung mite chuan duh loin nasa takin an dodal a ni.

Tualchhung mite chuan hei hi Assam Accord 1985 palzutna a nih thu an sawi a. March 24, 1971 hmaa India a awm chin chiah khua leh tuia chhiar turin an phut a ni.

Thawhlehni zana meeting an neihah hian Union Home Secretary Rajiv Gauba leh Director of Intelligence Bureau Rajiv Jain-te pawh an tel nia tarlan a ni a, meeting thuchhuak hi he thu ziah lai thleng hi chuan mumal taka tarlan a la ni lo.

Thudawnna ṭhenkhat chuan BJP thlawptu ṭhenkhat chuan Bill hi Assam-ah hmang ve lo turin an ngen niin an tarlang ve thung a ni.