NEHU in zirlai 8653 hnenah degree hlan

Meghalaya state khawpui Shillong-a North Eastern Hill University (NEHU) chuan Ni­laini khan an Convocation vawi 25-na hmangin zirlai 8,653 hnenah degree an hlan.

He hunah hian Meghalaya Governor Tathagata Roy chu Chief Guest niin zirlaite degree dawng thar te a lawmpui thu a sawi a, an nuna hlawhtlinna chang ngei tura bei turin a chah bawk.

Governor chuan zirlaite chu an theihna leh an talent te phochhuaka ṭangkai zawka chhawr turin a chah a ni.

Tathagata Roy chuan hmarchhakin theihna an neih chu hriatchhuah ṭan a nih thu sawiin, hmarchhak chuan tourism sector leh thil dangah pawh theihna an nei ngah hle niin a sawi.

Chief Minister Conrad Sangma pawhin he hun hi hman­puiin ṭhalaite chu an theihna te a ṭha zawng leh ṭangkai zawka hmang turin a chah a, state leh ram hmasawnna atana an theihna te hmang turin a chah.Khawvela ram naupang tak tak te chakna chu ṭhalaite kuta innghat anih thu sawiin ṭhalaite chuan a ṭha zawngin danglamna an thlen thei a ni, a ti.

Chief Minister chuan En­treprenuership pawimawhna sawiin ṭhalaite chu hna zawngtu mai ni lo, hna siamtu ni tum zawk turin a chah bawk.

Hetihlai hian NEHU 25th Convocation neih tur hi North Eastern Hill University Teachers’ Association (NEHUTA) chuan an boycott thung a, an thlawp lo a ni. Heti­ chung hian tluang takin convo­cation hi an nei tho a ni.

NEHUTA hian University kalpung leh tihdan palzut a nih thu sawiin Convocation hi an dodal a, kum thum kalta chhung khan court meeting pawh an nei tawh lo niin a sawi.

Zirlai degree nei thar 8,653 zinga 7,246 hi Bachelor degree hmu an ni a, Post Graduate degree hmu 1,222 awmin M. Phil 38 bakah Ph.D hmu 147 an awm a ni.