Assam CM-in NRC a thara kalpui leh rawt

Assam chief minister Himanta Biswa Sarma chuan National Register of Citizens (NRC) chu state chhunga a thara buatsaih leh a rawt a, hemi chungchang hi a kaihhruai sorkar chuan Supreme Court-ah thlen a tum.

Pathiannia media mite a kawmnaah CM Sarma chuan he thu hi a sawichhuak a, All Assam Students' Union (AASU) nen pawh hemi chungchangah hian inbiakna an nei mek tih a sawi.

India khua leh tui dik takte ziahluhna, NRC hi kum 1951 khan buatsaih ṭan a ni a, kum 2018-ah dan loa Pakistan aṭanga rawn lutte hming paihchhuah a nih theihna atan tihthar leh a ni a, mahse list-ah hian mi nuai 40 chuang zet hmaih an nih avangin sawisel pawh a tawk nasa hle. Kum 2019, August thla khan NRC final list hi tihchhuah a ni a, dilna thehluttu mi vaibelchhe 3.3 zingah mi nuai 19.06 hmaih an ni. Khua leh tui dik tak tam tak hmaih an nih avang hian sawisel a hlawh zui leh hle a ni.

Kar liam ta Ningani khan minister Atul Bora chuan state sorkarin NRC ennawn ṭha leh tura Supreme Court-a ngenna thlen an tum thu a lo sawi tawh a, hei hi AASU leh indigenous organisation hrang hrangte meeting an neiha an rel a ni tih a sawi. "Kum 2019 August thlaa NRC list tihchhuah khan kan pawm thei lo a ni," a ti.

AASU advisor Samujjal Bhattacharya chuan NRC list-ah hian India khua leh tui dik tak tam tak hmaih an nih laiin, dan loa Bangladesh aṭanga lutte eng emaw zat telh an ni thung tih a sawi. "Hei vang hian NRC list hi ennawn kan duh a, a hma pawhin Supreme Court-ah pawh petition kan lo thehlut tawh bawk. Sorkar laipui leh state sorkar hnenah pawh NRC list tihdik an neih theihna atana Supreme Court lamah hma la turin kan lo nawr tawh a ni," tiin a sawi.