Manipur sorkar tharin ni 100 chhunga hna thawh tur puang

Manipur-a BJP sorkar thar chuan ni 100 chhunga an hna hmalakna tur point 100 an puang.

Sorkar thar lakluh a nih aṭang a ni ngana, Pathianni khan chief minister N Biren Singh chuan press conference a neihah an hma lakna tur hi a puang a ni.

Manipur CM term hnihna chelh mektu Singh chuan, "Action Points 100 kan siam hi Manipur mipuite tana sorkar tharin hna a thawh dan turte lo lantir lawkna a ni," a ti.

Sorkar thar lakluh a nih aṭanga ni 100 chhunga a hna thawh tur tarlan zingah hian Model Anganwadi Centre 16 hawn tur te a tel a, hei bakah hian Manipur Old Age Pension Scheme hnuaia beneficiary 16,000 leh Chief Ministers Widow Pension Scheme hnuaia beneficiary 10,000 te hnena pensioin sem tur pawh a tel.

Tamenglong, Chandel leh Churachandpur district-a sorkar health facility-ah solar power system hawn a ni dawn a; Tamenglong, Senapati, Ukhrul, Jiribam, Churachandpur leh Chandel district-ah Amusement cum Childrens Park hawn a ni bawk ang.

Ni 100 chhung hian prepaid power meter 50,000 vuah hman tum a ni a, hei hian electric bill aṭanga sum lut pawh a tiziaawm thei dawn a, hei bakah hian sub division 68 huam chhungah sub divisional devopement mission hawn a ni dawn tih CM chuan a sawi.

Singh chuan Chief Minister's Office (CMO)-a anti-corruption cell chu din thar leh a ni dawn tih a sawi bawk.

Deputy commissioner, superintendent of police, divisional forest officer leh sorkar hnathawk dangte pawh ni 100 chhung chuan post-na district-ah awm vek tur tih an ni a, an awmna district an chhuahsan dawn a nih pawhin chief secretary, director general of police, head of forest zinga a tu ber emaw hnen aṭangin phalna an lak hmasak phawt a ngai dawn a ni.

‘Meeyamgi Numit’ (People’s Day) kalpui chhunzawm zel a nih tur thu sawiin, DC tinte chu an district-ah thla khata ni khat chu district level 'Meeyagmi Numit' meeting buatsaih turin tih an ni a, he hunah hian mipuite chuan an harsatnate thlenin, rawtna te an siam thei bawk ang. Heng meeting-ah hian SP, DFO leh District level officer-te chu tel tura tih an ni bawk.

BJP kaihhruai ṭangrual sorkar hmasaah khan kum nga chhung chu ‘Meeyamgi Numit’ hi hman a lo ni tawh a, thla tin ni 15-ah hman ṭhin a ni.