Arunachal leh Tripura-a Covid hri kai mek awm tawh lo

Arunachal Pradesh leh Tripura state chu Covid-19 hri lakah fihlimin, hri kai mek an awm tawh lo.

Inrinni zan aṭang khan Arunachal Pradesh-ah hian active case hi an awm tawh lo a, Tripura hi chu kar khat dawn Covid hri lak aṭang hian a fihlim tawh thung. Ni 10 liam ta chhungin hmarchhak state-a district tam zawkah hri kai hmuh an awm tawh lo bawk.

Arunachal Pradesh health secretary P Parthiban chuan Covid-19 hri leng thawh thumna dona kawngah health department official-ten theihtawp an chhuah thu leh, active case awmna hmunte tlawhin mel tam takte an zin kual tih a sawi. Theihtawp an chhuah tlanna avangin, nikum December thla tawp lam aṭanga hri leng thawh thumna thlengah active case nei loin an awm ta tih a sawi.

Kum 2020, April thla aṭang khan Arunachal Pradesh-ah hian Covid hri kai hmuhchhuah hi 64,484 awmin, an zinga 296 in an thihpui a ni.

Tripura hian Covid hri laka an fihlim theihna turin kumin January thla aṭang khan state pawn aṭanga lutte chu screening an neihsak a, Agartala airport-a lutte pawh RT-PCR report an nei chung pawhin test neih sak leh vek an ni bawk. Health services director Subhasis Debbarma chuan an state-ah Covid active case an awm tawh lo a, ni 10-15 chhung chu positive hmuh thar an awm tawh lo tih a sawi. Nitin sample 1,000 chuang an la test ṭhin tih a sawi bawk.