Assam sorkarin HPCL paper mill 2 lachhawng dawn

Assam sorkar chuan Hindustan Paper Corporation Limited (HPCL) paper mill hluihlawn pahnih chu Rs vaibelchhe 374 in a lachhawng tih a sawi.

State sorkar aiawhin Assam Industrial Development Corporation (AIDC) chuan Nagaon leh Cachar-a HPCL paper mill-te chu an kuta an la tawh tih official thuchhuah chuan a tarlang.

Sorkar thuchhuah chuan, "Hun rei tak hma lak a nih hnu leh, inbiakna leh meeting-te ṭum eng emaw zat neih a nih hnuin, Assam sorkar kutah Morigaon district-a Nagaon paper mill leh Hailakandi district-a Cachar paper mill-te thil neihte chu a awm ta a ni," a ti. State sorkar chuan paper mill-a assets, plant leh technical area lakchhawnna atan hian Rs vbc 375 pein, paper mill pahnih awmna hmun zau zawng hi acre 1,550 vel a tling. Sum hi Insolvency and Bankruptcy Code (IBC) 2016 norms angin company kutah a pe ang a, a bak Rs vbc 700 chu hnathawkte hlawh ba la awmte tihfelna atan hman a ni ang, a ti.

Chief minister Himanta Biswa Sarma chuan sorkar kuta a awm tak vangin paper mill-a thawkten hun rei tak harsatna an lo tawhte pawh a ziaawm thei tawh dawn a ni, tiin a sawi.

Panchgram-a Cachar paper mill hi kum 2015, October 20 aṭang khan tihtawp a ni a, Jariroad-a Nagaon mill hi kum 2017, March 31-ah khan tihtawp a ni bawk. Cachar mill-a thawkte hian kum 2017, January thla aṭangin hlawh an la tawh lo a, Nagoan unit-a thawkte hian hemi kum vek March thla aṭangin hlawh an la tawh lo bawk.

Nikum September 30 khan Assam cabinet chuan paper mill pahnih chhamdawlna tur hian Rs vbc 700 pek a lo pawm tawh a, sum ruahman zinga a tam zawk hi hnathawkte hlawh ba pekna atana tih niin, mill pahnih bill ba hrang hrangte pek tura tih a ni bawk a ni.

Kum 2018, June thla khan National Company Law Tribunal (NCLT) chuan HPC hnenah hian Insolvency and Bankruptcy Code (IBC), 2016 hnuaiah Corporate Insolvency Resolution Proceedings kalpui turin a ti a, HPC hian mill pahnih tuaithar lehna tur hian Rs vbc 1,995 rawtna sorkarah a thlen a ni. Mill hluihlawn tawhte tuaithar lehna tura hmalakna hi stakeholder-te meeting pui leh, hearing ṭum eng emaw zat neih a nih hnuah pawh a hlawhtling thei lo a, nikum April 26 khan NCLT chuan HPCL paper mill pum hi National Company Law Appellate Tribunal (NCLAT) thutlukna siam anga hralh mai turin a ti ta a ni.

Hemi hnu hian heng paper mill pahnihte hi lilam a ni a, Rs vbc 1,139-in an ṭan a, mahse chhangtu an awm lo. Chhangtu an awm mumal loh avangin a man zat pawh tihhniam zel a ni a, a tawpah Assam sorkar chuan Rs vbc 375 in a chang thei ta a ni.