Sikkim CM hlui BB Gurung a thi

Sikkim chief minister hlui, BB Gurung chu Thawhṭanni khan kum 92 mi niin Gangtok-a Lumsui hmuna a chenna inah a thi.

Sikkim CM pathumna, Gurung hian fapa pahnih leh fanu pakhat a thihsan a ni.

State sorkar chuan CM hlui hi ni sarih chhung, April 3 thleng sun a ni dawn tih a puang.

Kum 1929, October 11-ah BB Gurung hi Chakung-ah a piang a, Darjeeling-ah St Roberts School-ah kalin, University of Calcutta aṭangin a graduate a ni. A graduate hnuah zirtirtu hna rei vak lo thawkin, a hnuah English chanchinbu Amrita Bazar Patrika-ah staff reporter a ni.

Kum 1947-a Sikkim State Congress din anih hnuah member-ah tel nghalin, kum 1958-ah general secretary-ah ruat a ni. Kum 1967-ah Executive Councillor atan thlan a ni leh bawk.

Kum 1977 khan Sikkim state assembly hmasa berah Sikkim National Congress candidate-in thlan thlin a ni a, Speaker atan ruat niin kum 1979 thleng he dinhmun hi a chelh.

Sikkim chief minister pathumna turin kum 1984 May thla khan Gurung hi lakluh a ni a, mahse kar hnih chhung chauh CM hi ni hmanin, Sikkim CM ni rei lo ber a ni. Politics lam buaina avanga a kaihhruai sorkar a tlak hnuah, an state-ah hian President's Rule puan a ni zui ta a ni.