Hornbill 2018 Festival Rajnath Singh-an kick off ; Tlawhtu mi 19,953 awm nghal

Hmarchhaka festival lian bera chhal ngam Hornbill Festival chu Inrinni khan Union Home Minister Rajnath Singh chuan a hawng.

Kumin Hornbill festival hi a vawi 19-na niin Naga Heritage Village Kisa­ma-ah hman a ni a, Kisama hi Nagaland state khawpui Kohima aṭanga km 12 vela hlaah a awm a ni.

Rajnath Singh chuan Nagaland mipuite chu Hornbill festival bakah an Statehood Day a nih avangin chibai a buk a, Rajnath chuan Hornbill festival chu Nagaland mipuite tihdanphung leh hnam kalphung hausa tak tarlanna a nih thu a sawi.

Union Minister chuan ramchhung hmun dangah pawh hetiang festival lian hi buatsaih ve a ṭul thu sawiin, “Ek Bharat, Shrestha Bharat” thinlung pu chungin national capital bakah state dang pawhin buatsaih ve se a duh thu a sawi a ni.

Nagaland awmna hmun chu hmun ṭha tak a nih thu sawiin sorkar laipui pawhin inkalpawhna ṭha zawk siam a duh hle tih a sawi a, South-East Asia ram-te nen pawha inpawhna ṭha zawk neihna tur a nih thu a sawi bawk.

Nagaland Statehood vawi 55-na a nih nghal bawk avangin Singh chuan mipuite chu economic hmasawnna lam ngaihtuah turin leh India ram wolrd power a siamna tura tha thawh turin a sawm.

Union Home Minister hian Nagaland tribe 17-te Morung dah a tlawh bawk a, exhibition stall-te pawh a tlawh bawk a ni.

Inrinni-a Hornbill festival hawn­naah hian Nagaland Governor PB Acharya, Chief Minister Neiphiu Rio, US Ambassador to India, Kenneth I Juster leh Justice Sharad Arvind Bobde-te bakah mi pawimawh eng emaw zat an tel.

Nagaland Governor PB Acharya leh Chief Minister Neiphiu Rio-te chuan Hornbill Festibval chu khawvel pumah pawh festival sawi hlawh leh tourism event pawimawh an nih thu an sawi.

PB Acharya chuan Naga-te chu ramchhunga festival sawi hlawh ber Hornbill festival an buatsaih theih avangin fak an phu hle tih a sawi a, India sorkar pawhin ramchhunga artist langsarte perform nasatna ber hun tia an hriat thu a sawi a ni.

Governor chuan remna leh muanna pawimawhna thu sawiin remna leh muanna awm tir zel chu a pawimawh thu a sawi a, New Delhi nena inremna zawnga inbiaknaah pawh Thiltithei bera malsawmna ka beisei a ni, tia sawiin muanna tluantling an neih theih dawn thu a sawi.

Chief Minister Neiphiu Rio pawhin kum 19 kalta chhung khan Hornbill Festival chu India ram mai ni lo, khawvel pumah tourism event pawimawh ber zinga mi a nih thu a sawi. An hnam culture leh tradition pholanna hun ṭha tak a nih thu sawi bawkin, eco-tourism lama hmasawnna tura pawimawh tak a ni bawk tih a sawi a ni.

Hornbill festival ni hmasa berah hian tlawhtu mi 19, 953 an awm nghal a, heng zinga 382 hi ramdang mi niin state pawn mi 3371 an ni bawk a, tualchhung mi 16,200 an awm thung a ni.

Festival hi December 10 thleng chhunzawm tur a la ni a, a ni hnihna, nimin khan Nagaland Governor PB Acharya chu Chief Guest a ni thung.

Vawiin hian Indira Gandhi National University Centre for Arts secretary Dr Sanchindanand Josjhi chuan festival hlanna a nei ve thung ang.