Assam-Meghalaya-in ramria inremna an ziak ta

Assam leh Meghalaya chuan kum 50 zet ramri chungchanga buaina an lo neih tawh hmun 12 zinga paruka inremna, Memorandum of Understanding (MoU) chu Thawhlehni tlai khan an ziak ta.

Assam chief minister Himanta Biswa Sarma leh Meghalaya chief minister Conrad K Sangma-ten inremna an ziah lai hian union home minister Amit shah bakah state pahnih chief secretary leh Home Ministry official-ten an telpui a ni.

Ministry of Home Affairs (MHA) office-a inremna an ziahnaah Meghalaya state sorkar aiawh mi 11 leh Assam aiawh mi pakua an tel.

Union home minister Amit Shah chuan Assam leh Meghalaya state-ten kum 50 zet ramri chungchanga buaina an lo neih tawh chu chinfel a ni ta tih sawiin, inremna an ziah takna hmun paruk hi state pahnihte ramri aṭanga 70% vel zet a tling pha tih a sawi. A bak hmun paruk dangah pawh a rang thei ang bera inremna siam leh thuai tum a ni, a ti. Assam leh Meghalaya chief minister leh an team-te chu lawmpuina a hlan nghal bawk.

Assam chief minister Himanta Biswa Sarma chuan, "Kan tana ni chhinchhiah tlak a ni. Thla ruk/thla sarih hnuah buaina neihna dangte pawh chinfel theih leh kan tum a ni. Hmarchhak bial chu India ramin hma a sawnna tura peng pawimawh taka siam tumin kan bei zel dawn a ni," a ti.

Meghalaya chief minister Conrad K Sangma pawhin an buaina chinfel theihna tura kawng a buatsaih sak avangin Home Minister Amit Shah chu lawmthu hrilhin, Assam CM Sarma vangin inremna hi an siam thei chauh niin a sawi. Ramri chungchang buaipuitu, state pahniha committee member leh officer-te chungah pawh lawmthu sawiin, buaina an la neih mekna dang pawh chinfel thuai an tum tih a sawi bawk.

State pahnihten inremna an siamna, ramri hmun paruk hi square km 36.79 niin, a huam chhungah hian khaw 36 a awm. Inremna an siam angin, Assam hian square km 18.51 a chang dawn a, Meghalaya hian square km 18.28 a chang thung ang. Kum 2021, June thla khan state pahnihte hian 'give and take' policy hmanga ramri hmun paruk buaina chinfelna turin hma an la ṭan a, regional committee-te siam ve vein, an ni hian ramri buaina laite hi an tlawh a, buaina chinfelna tura rawtna an thehluh behchhanin draft resolution siam a ni ta a ni. He resolution hi MHA-ah thehlutin, state pahnih chief minister-te hian Amit Shah pawh an lo sawipui tawh bawk a ni.

Assam hian Megha-laya chauh ni lo, a ṭhenawm state dang - Arunachal Pradesh, Mizoram leh Nagaland-te nen ramri buaina an nei mek bawk. Heng sgate-te hi kum 1963-1972 inkara Assam aṭanga state hrana din vek an ni.