Sports Digital Experience Centre dinna turin Manipur sorkar leh Samsung India-in MoU ziak

Manipur state sorkar chuan world class “Sports Digital Experience Centre” dinna turin Nilaini khan Samsung Data System India Pvt. Ltd. leh Abhitech IT Solutions Pvt. Ltd-te chu Memorandum of Understanding (MoU) a ziahpui.

Chief Minister Secretariat-a cabinet ball-a inremna ziahnaah hian state sorkar aiawhin Youth Affairs and Sports special secretary Namoijam Kheda Varta Singh a tel a, Samsung Data System India Pvt. Ltd. aiawhin Director of Business Development, India & SAARC Tae Heun Kim leh Abhitech IT Solutions Pvt. Ltd aiawhin CEO leh Director Amit Mohan Sirvastava a tel bawk. Chief minister N Biren Singh-a'n a telpui bawk.

CM Singh chuan sorkar chuan Olympian-te tumruhna leh hlawhtlinnaten ṭhangthar zawkte a chawh phurna turin Manipur Olympian Park chu an dah pawimawh hle tih a sawi a, he park hi ni 100 chhunga siam zawh hman an tum thu a sawi. Digital Experience Centre din turah hian Manipur aṭanga Olympian-te hlawhtlinna hrang hrangte pholan a ni dawn a ni, a ti. Hei bakah hian an state aṭanga infiammi hlawhtlinna dangte pawh Khuman Lampak Sports Complex-ah pholan a ni dawn bawk tih a sawi.

Manipur Olympians Park hi Sangaithel hmunah siam mek a ni a, hetah hian Manipur aṭanga Olympian-te lim 19 dah a ni ang.