Tripura Congress-in thil man sang duh lohna lantir dawn

Congress party-in fuel leh khawsakna man sang zel duh lohna lantira,'Mehngai Mukt Bharat Abhiyan' a buatsaih chu Tripura Pradesh Congress Committee (TPCC) pawhin an zawm ve dawn.

TPCC chuan April 7 hian state chhungah thil man sang duh lohna lantirin darkar 12 awh nawrh an huaihawt dawn a ni.

Nilaini khan All India Congress Committee secretary Zsarita Laitphlang kaihhruaiin party hruaitute chuan nawrh kalpui dan tur chu an rel tih party state president Birajit Sinha chuan a sawi.

Birajit Sinha chuan, "Sorkar chuan nitin mamawh man sang zel avanga mipui nawlpuiten harsatna an tawhte chu a haider tlat a ni. Covid-19 hri lengin mi retheite nasa takin a nghawng tawh a, tunah thil man san belh zel chuan an harsatna nasa takin a belhchhah leh a ni," a ti.

TPCC president chuan nakkuma an state assembly neih tur thlirin an party pawh an intuaithar mek tih a sawi bawk a, nimin khan Unakoti district-a Kailashahar-ah convention an nei a, district dangah pawh convention hi neih vek a ni dawn tih a sawi.