Assam Assembly aṭangin Congress MLA suspend

Assam-a Congress MLA Nurul Huda chu Nilainia Assembly-a Question Hour hman laia speaker Biswajit Daimary a an khum avangin hun rei vak lo House aṭangin suspend a ni.

Huda hi House aṭanga suspend a nih hnuah pawh a kalchhuah duh loh avangin marshal-ten an hruai chhuak a ni. Huda hruaichhuah a nih hnuah eptu MLA dang zawng chu lungawi loin House aṭangin an chhuak tau zui ve nghal bawk.

Question Hour hmanah Huda hian cooperative society election chungchangah zawhna a nei a, mahse a zawhna zawh hma hian rei tak a sawifiah hmasa phawt a ni. Hei hi Speaker Daimary chuan lo khakin, sawifiah kher a ngai loh thu leh a zawh duh tak chu sawi nghal mai turin a ti. Huda'n a sawifiah mek laiin Speaker chuan Congress MLA Kamalakhya Dey Purkayastha chu a zawhna neihte zawh turin a sawm san a ni. Dey hian Huda chu zawhna zawh phalsak phawt turin a ngensak a, mahse Speaker hian a lo pawmsak duh ta lo a ni.

Speaker-in a zawhna neih sawi a phalsak tak loh avangin Huda hi a lungawi lo hle a, Speaker chu thinur takin a ankhum a ni. Hei vang hian Question Hour chhung chu House aṭanga suspend-in chhuah tir a ni zui ta bawk. Question Hour zawhah Speaker chuan Huda hremna hi a titawp leh nghal a, Huda leh Congress MLA dangte pawh House chhungah rorelnaa tel turin a lut ve leh nghal a ni.